मोफत नेत्र तपासणी शिबिरास उत्स्फूर्त प्रतिसाद,ज्येष्ठ नागरिकांचा बिनविरोध निवडणुकीचा संकल्प.
कराड |कृष्णाकाठ वृत्तसेवा:
कराड तालुक्यातील नारायणवाडी हे गाव सामाजिक एकात्मता, सुसंवाद आणि समाजाभिमुख उपक्रमांमुळे आदर्श ठरत आहे. समाजसेवेचा आणि आरोग्यजागरुकतेचा उत्तम संगम साधत येथील नारायणवाडी विकास सोसायटीतर्फे दि. ६ नोव्हेंबर २०२५ रोजी कै. रा. की. लाहोटी लायन्स चॅरिटेबल आय हॉस्पिटल यांच्या सहकार्याने मोफत नेत्र तपासणी व मोतीबिंदू शस्त्रक्रिया शिबिराचे आयोजन करण्यात आले.
या शिबिराचे आयोजन ग्राहक पंचायत महाराष्ट्र शाखा कराड, मानव अधिकार कराड व वनवासी कल्याण आश्रम सदस्य नितीन शाह यांच्या संयुक्त विद्यमाने करण्यात आले. तज्ञ डॉक्टरांच्या मार्गदर्शनाखाली ग्रामस्थांची मोफत नेत्र तपासणी करण्यात आली. गरजूंना अल्प खर्चात मोतीबिंदू शस्त्रक्रियेची सुविधा उपलब्ध करून देण्यात आली.
या उपक्रमास गावकऱ्यांचा उत्स्फूर्त प्रतिसाद मिळाला असून अनेक ज्येष्ठ नागरिकांना डोळ्यांच्या आरोग्याबाबत महत्त्वपूर्ण मदत मिळाली. या प्रसंगी नारायणवाडी विकास सोसायटीचे चेअरमन श्री. कृष्णात यादव, माजी चेअरमन प्रमोद हरदास, सचिव संजय कारंडे, ग्रामपंचायत अधिकारी प्रशांत माळी, तसेच कालेटेक आणि मुनावळे गावातील प्रमुख कार्यकर्ते उपस्थित होते.
ग्रामविकासासोबतच सामाजिक सलोख्याचं दर्शन घडवत नारायणवाडीतील ज्येष्ठ नागरिकांनी स्थानिक स्वराज्य संस्थांच्या निवडणुका बिनविरोध पार पाडण्याचा संकल्प केला आहे. त्याची सुरुवात विकास सोसायटीची निवडणूक बिनविरोध करून करण्यात आली. या निर्णयाने गावाच्या एकात्मतेचा आणि प्रगल्भतेचा आदर्श उभा राहिला आहे.
महिला सक्षमीकरण, ‘लखपती दीदी’ अभियान, वृक्षारोपण, स्वच्छता, आरोग्य आणि समाजसेवा अशा विविध उपक्रमांद्वारे नारायणवाडी गाव सातत्याने स्वच्छ, समृद्ध आणि आदर्श ग्रामविकासाच्या दिशेने वाटचाल करीत आहे.
नारायणवाडीचा हा एकात्मतेचा आणि जनसेवेचा उपक्रम संपूर्ण कराड तालुक्यासाठी प्रेरणादायी ठरत आहे.
