देशभक्तीच्या स्वरांनी दुमदुमले विद्यालय परिसर
मलकापूर| कृष्णाकाठ वृत्तसेवा:
भारतीय राष्ट्रभावनेचे प्रतीक असलेल्या ‘वंदे मातरम’ या राष्ट्रीय गीताला यंदा १५० वर्षे पूर्ण झाली. या ऐतिहासिक निमित्ताने आनंदराव चव्हाण विद्यालयात तब्बल पाचशे विद्यार्थ्यांनी एकत्र येऊन ‘वंदे मातरम’ची प्रतीकात्मक प्रतिकृती साकारून या गीताला अभिवादन केले. देशभक्तीच्या जयघोषाने आणि ‘वंदे मातरम’च्या स्वरांनी संपूर्ण विद्यालय परिसर दुमदुमून गेला.
या विशेष उपक्रमास विद्यालयाचे मुख्याध्यापक, उपमुख्याध्यापक, पर्यवेक्षक, शिक्षकवृंद तसेच सर्व विद्यार्थी मोठ्या उत्साहाने उपस्थित होते. विद्यार्थ्यांनी शिस्तबद्ध रचनेतून ‘वंदे मातरम’चे साकार रूप सादर करत देशप्रेम, एकता आणि मातृभूमीप्रती असलेली निष्ठा व्यक्त केली.
‘वंदे मातरम’ या गीताची रचना बंकिमचंद्र चॅटर्जी यांनी इ.स. १८७६ साली केली होती. हे गीत सर्वप्रथम इ.स. १८९६ मध्ये भारतीय राष्ट्रीय काँग्रेसच्या कलकत्ता अधिवेशनात कवी रवींद्रनाथ टागोर यांनी सादर केले. या गीतातून बंकिमचंद्र चॅटर्जी यांनी भारतमातेला शक्तिशाली, सुंदर, समृद्ध आणि शांत देवीच्या रूपात चित्रित केले असून स्वातंत्र्यलढ्यात या गीताने असंख्य भारतीयांना प्रेरणा दिली होती.
आज १५० वर्षांनंतरही या गीताचा स्वर प्रत्येक भारतीयाच्या अंतःकरणात राष्ट्रप्रेमाची ज्योत प्रज्वलित करतो, याचे प्रतीक म्हणजे आनंदराव चव्हाण विद्यालयातील विद्यार्थ्यांचा हा प्रेरणादायी उपक्रम ठरला.
