कराड |कृष्णाकाठ वृत्तसेवा :
कराड तालुक्यातील प्रगतिशील वाटचाल करणाऱ्या नारायणवाडी गावाला कराड पंचायत समितीचे गटविकास अधिकारी श्री. प्रताप पाटील तसेच गावाचे प्रशासक श्री. बोलके यांनी भेट देऊन विविध विकासकामांचा सखोल आढावा घेतला.
भेटीदरम्यान ग्रामस्थांनी हिरीरीने राबवलेल्या श्रमदान उपक्रम, स्वच्छता अभियान, पर्यावरण संवर्धन व सामाजिक उपक्रमांचे अधिकारीांनी विशेष कौतुक केले. “मुख्यमंत्री समृद्ध पंचायत अभियानात नारायणवाडी निश्चितच चमकदार कामगिरी करेल,” अशी प्रशंसनीय प्रतिक्रिया दोन्ही अधिकाऱ्यांनी व्यक्त केली.
ग्रामस्थांच्या सक्रिय सहभागामुळे गावामध्ये सकारात्मक व अनुकरणीय बदल घडत असल्याचे समाधान मान्यवरांनी व्यक्त केले. विविध उपक्रमांना मिळालेला उत्स्फूर्त प्रतिसाद पाहता हे गाव प्रगतिशीलतेचे नवे मापदंड स्थापित करीत असल्याचे त्यांनी नमूद केले.
गावाच्या विकासाला चालना देण्यासाठी आपल्या व्यस्त वेळातून अधिकाऱ्यांनी दिलेल्या भेटीबद्दल ग्रामस्थांनी कृतज्ञता व्यक्त केली. नारायणवाडीचा बदलता चेहरा आणि सर्वांगीण प्रगती मुख्यमंत्री समृद्ध पंचायत अभियानात नक्षीस मिळवून देईल, असा दृढ विश्वास ग्रामस्थांनी व्यक्त केला.
