काले | प्रतिनिधी
मुख्यमंत्री समृद्ध पंचायतराज अभियानांतर्गत ग्रामविकास आणि महिलांच्या आर्थिक सक्षमीकरणाचा प्रभावी संगम साधणारा उपक्रम नारायणवाडी (ता. कराड) ग्रामपंचायतीने हाती घेतला आहे. “लखपती दिदी” अभियानाच्या माध्यमातून गावातील महिलांना आर्थिक स्वावलंबनाचे बळ मिळावे, यासाठी ग्रामपंचायतीत विशेष मार्गदर्शन सभेचे आयोजन करण्यात आले.
या सभेला ग्रामपंचायत अधिकारी श्री. प्रशांत माळी, पंचायत समिती कराड (उमेद) चे प्रभाग समन्वयक श्री. करण जाधव, तसेच रणरागिणी महिला ग्रामसंघाच्या अध्यक्षा सौ. लता यादव उपस्थित होत्या. या सर्व मान्यवरांनी महिलांना बचत गटांच्या माध्यमातून स्वावलंबी कसे व्हावे, शासनाच्या विविध योजना कशा उपयोगात आणाव्यात, याबाबत सविस्तर मार्गदर्शन केले.
सभेला गावातील महिलांचा उत्स्फूर्त प्रतिसाद लाभला. महिलांनी मुख्यमंत्री समृद्ध पंचायतराज अभियान 100 टक्के यशस्वी करण्याचा निर्धार व्यक्त केला. तसेच गाव प्लास्टिकमुक्त करण्याचा आणि 15 नोव्हेंबरपर्यंत 100 टक्के पाणीपट्टी वसुली पूर्ण करण्याचा ठराव सर्वानुमते मंजूर करण्यात आला.
हा उपक्रम केवळ नारायणवाडीपुरता मर्यादित न राहता, इतर ग्रामपंचायतींसाठीही आदर्श ठरावा, असा निर्धार उपस्थितांनी व्यक्त केला.
नारायणवाडी ग्रामपंचायतीचा “लखपती दिदी” अभियानासह स्वच्छ, समृद्ध आणि आदर्श ग्रामविकासाकडे टाकलेला हा पाऊलखूण ठरेल, असा विश्वास यावेळी व्यक्त करण्यात आला.
