येळगाव|कृष्णाकाठ वृत्तसेवा:
शिवछत्रपती प्रतिष्ठान – एक सामाजिक जबाबदारी या सामाजिक संस्थेच्या वतीने दीपावलीच्या शुभमुहूर्तावर “अदृश्य सेवक” या पहिल्या पुरस्काराचा मान नेताजी सुभाषचंद्र विद्यालय, येळगाव येथील चतुर्थश्रेणी कर्मचारी अशोक बळवंत होगले यांना मिळाला. त्यांच्या घरी जाऊन प्रतिष्ठानच्या पदाधिकाऱ्यांनी शाल, फेटा, श्रीफळ आणि ₹१५,०००/- (बँक ऑफ महाराष्ट्रचा धनादेश) देऊन सन्मानपूर्वक गौरव केला.
श्री. होगले हे मागील सहा-सात वर्षांपासून विद्यालयात शिपाईपदी कार्यरत असून, पूर्वी पाच कर्मचाऱ्यांची जबाबदारी आता एकट्याने पार पाडत आहेत. अल्प मानधनातही निष्ठा, वक्तशीरपणा आणि सेवाभाव टिकवून ठेवणाऱ्या अशा कर्मचाऱ्याचा गौरव समाजाने व्हावा, या भावनेतून हा उपक्रम राबविण्यात आला असल्याचे संस्थेचे अध्यक्ष प्रशांत शेवाळे यांनी सांगितले.
या प्रसंगी माजी शिक्षणाधिकारी व गणेशवाडीचे सरपंच बाळासाहेब माने, माजी प्राचार्य डी. टी. शेवाळे, माजी केंद्र शाळा प्रमुख वसंतराव पाटील, परसू आन्णा, सुशांत पाटील, दिलीप नायकवडी, झुंजार पाटील, मनोज पांगे, सचिव आकाराम शेटे तसेच शिवछत्रपती प्रतिष्ठानचे पदाधिकारी उपस्थित होते.
या उपक्रमाच्या यशस्वीतेसाठी प्रशांत पाटील, कर्नल डॉ. प्रदीप पाटील, अरुण गोडसे, राजेंद्र शेवाळे, ज्योतिराम चव्हाण (सॅन्डोज), राजेंद्र विभुते, संदीप पाटील, स्वरूप पाटील, महेश शेवाळे (उद्योजक), सुजाता पाटील, राहुल पाटील, सूरज पाटील, राजू सुपनेकर, सुशांत व्ही. पाटील, राजेश सोरटे, विजय पवळे, विजय शेवाळे आदींचे सहकार्य लाभले.
शिवछत्रपती प्रतिष्ठानच्या वतीने यापूर्वीही अनेक समाजोपयोगी उपक्रम राबविण्यात आले असून, सामाजिक जबाबदारी जोपासत अशाच नव्या योजना राबविण्याचा निर्धार प्रतिष्ठानच्या कार्यकर्त्यांनी व्यक्त केला.
