सणबूर | प्रमोद पाटील : महाराष्ट्र व कर्नाटकातील लाखो भाविकांचे श्रद्धास्थान असलेल्या श्री नाईकबा देवाची यात्रा "नाईकबा च्या नावानं चांगभलं "च्या गजरात आणि गुलाल खोबऱ्यांच्या उधळणीत लाखो भाविकांच्या उपस्थितीत उत्साहात पार पडली. बनपूरी, ता.पाटण येथील श्री नाईकबा देवाची यात्रेनिमित्त येथील नाईकबा डोंगरावर भाविकांचा जनसागर उसळला होता भाविकांच्या मध्ये मोठे उत्साहाचे वातावरण होते.
यात्रेच्या आदल्या दिवशी सायंकाळी हजारोंच्या संख्येने स्वतः च्या,व मिळेल त्या वाहनाने बैलगाडी ने भक्त नाईकबाच्या डोंगर माथ्यावर दाखल झाले होते. चैत्र शुद्ध पंचमी गुरुवार दि.३ एप्रिल हा देवाचा नैवद्याचा दिवस तर चैत्र शुद्ध षष्ठी शुक्रवार दि ४ एप्रिल हा यात्रेचा मुख्य दिवशी देवाचा पालखी सोहळा पहाटे संपन्न झाला.
महाराष्ट्र- कर्नाटकातील लाखो भाविकांचे कुलदैवत व श्रद्धास्थान असलेल्या बनपूरी गावचे ग्रामदैवत असलेल्या श्री नाईकबा देवाच्या यात्रोत्सवाच्या पार्श्वभूमीवर नाईकबा पठारावर ६० ते ७० सासनकाठ्यां येतात त्यात मानाची समजली जाणारी कराड येथील रैनाक व शिंदे यांच्या सासनकाठीचे गुढीपाडव्या पुर्वीच दाखल झाली होती. सासनकाठीचे कराड ते नाईकबा पठारापर्यंत कुसुर, काढणे, खळे ,मालदन, कुंभारवाडा मंदुळकोळे खुर्द, जानुगडेवाडी येथे स्वागत व पुजन करण्यात आले.
शुक्रवार ४ एप्रिल हा यात्रेचा मुख्य दिवस होता या दिवशी पहाटे देवाचा पालखी सोहळा आणि नाईकबा च्या नावाचा गजर सुरू झाला पालखी,सासनकाट्यावर गुलाल खोबऱ्याची उधळण करण्यात आली.नाईकबाचा डोंगर गुलाबी रंगाने उधळून गेला होता. सासनकाठ्या वाद्यांच्या गजरात नाचवले जात होत्या या सोहळ्यानंतर देवाच्या दर्शनासाठी प्रचंड मोठी रांग लागली होती. मिठाईची दुकाने, हॉटेल,स्टेशनरी, खेळण्याची दुकाने, आशा अनेक दुकानाकडे यात्रेकरूंची प्रचंड गर्दी होती.यात्रेकरुसाठी दिनांक ३ एप्रिल रोजी यात्रेसाठी कुस्त्या चे मैदान आयोजित केली होते. महाराष्ट्र , कर्नाटक मधून मोठ्या प्रमाणावर भाविक डोंगरमाथ्यावर शनिवारी संध्याकाळी दाखल झाले होते. संपूर्ण परिसर नाईकबा च्या नावानं चांगभलंच्या गजरात व भजनाने दणाणून गेला होता.
यात्रा काळात नाईकबा भाविकांची कोणत्याही प्रकारची गैरसोय होऊ नये म्हणून जिल्हा व तालुका प्रशासन, ग्रामपंचायत बनपुरी,श्री नाईकबा देवस्थान ट्रस्टचे पदाधिकारी, यात्रा कमिटीचे सर्व पदाधिकारी व प्रमुख नागरिक आणि पोलीस विभाग,महसूल विभाग,आरोग्य विभाग, विजवितरण, बांधकाम अशा सर्व विभागानी चोख व्यवस्था ठेवली होती. त्याचबरोबर बनपुरी गावचे सुपुत्र महेश पाटील इन्फ्राटेक प्रायव्हेट लिमिटेड कंपनीचे व्यवस्थापकीय संचालक महेश पाटील यांनी स्वखर्चाने अनेक सुविधा भाविकासाठी उपलब्ध करून दिल्या होत्या.
यात्रा काळात कोणताही अनुचीत प्रकार घडूनेय म्हणून ढेबेवाडी पोलिस स्टेशनचे सपोनि प्रवीण दाईंगडे यांच्या मार्गदर्शनाखाली चोख पोलीस बंदोबस्त ठेवण्यात आला होता.
