"स्वच्छता, गुणवत्ता आणि यशाची परंपरा" या त्रिसूत्रीच्या बळावर तारळेतील जिल्हा परिषद प्राथमिक मुलांची शाळा राज्य सरकारतर्फे आयोजित ‘मुख्यमंत्री माझी शाळा, सुंदर शाळा’ स्पर्धेत पाटण तालुक्यात प्रथम क्रमांक पटकावून चमकली आहे. या यशाने शाळेच्या नावलौकिकात भर घालत गावाचा अभिमान द्विगुणित केला आहे.
तारळे शाळेने केवळ अभ्यासात नव्हे, तर शाळेच्या स्वच्छता मोहीम, हिरवाईने नटलेले आवार, आणि विद्यार्थ्यांच्या सर्वांगीण विकासासाठी राबवलेल्या उपक्रमांमुळे परीक्षकांची मनं जिंकली. या शाळेचा एक विद्यार्थी शिष्यवृत्ती परीक्षेत ३०० पैकी ३०० गुण मिळवत राज्यात प्रथम आला होता. अशा यशस्वी परंपरेमुळेच शाळा तालुक्यात ‘सुपरस्टार’ ठरली!
मुख्याध्यापक विजय जाधव आणि त्यांची प्रेरणादायी टीम — उपशिक्षक रियाज मणेर, अनिल लोहार, रोशन मणेर, प्रियांका साळुंखे, संग्राम जगदाळे, आणि मधुमती जगदाळे यांनी अपार मेहनत घेतली. शाळा व्यवस्थापन समितीचे अध्यक्ष अभिजित पाटील आणि उपाध्यक्ष, तसेच सदस्यांनी शाळेच्या चमकदार यशासाठी सतत पाठिंबा दिला.
या यशाच्या आनंदात गावात जल्लोषाचं वातावरण आहे. ग्रामपंचायतीचे उपसरपंच, स्थानिक राजकीय नेते, सामाजिक कार्यकर्ते आणि माजी विद्यार्थी यांनी शाळेचं फुलांनी स्वागत केलं. "आपल्या गावाची शाळा राज्यपातळीवर झळकतेय, यापेक्षा मोठं भाग्य दुसरं कोणतं" अशा भावना गावकरी व्यक्त करत आहेत.
तारळे शाळेचा हा आदर्श प्रवास इतर शाळांसाठी प्रेरणादायी ठरतो आहे. ज्ञान, शिस्त आणि कर्तव्यनिष्ठा यांचा त्रिवेणी संगम असलेली ही शाळा भविष्यातही असंच यशस्वी उंच भरारी घेईल, असा विश्वास सर्वांना वाटतो आहे!
____________________________________
तारळेच्या जिल्हा परिषद प्राथमिक शाळेने तालुक्यात प्रथम क्रमांक मिळवणं हे केवळ शाळेसाठीच नव्हे, तर संपूर्ण गावासाठी अभिमानास्पद आहे. शिक्षकांची मेहनत, विद्यार्थ्यांची जिद्द, आणि पालक-ग्रामस्थांचा पाठिंबा यामुळेच हे यश शक्य झालं. ही शाळा केवळ सुंदर इमारतीसाठी नव्हे, तर गुणवत्तापूर्ण शिक्षणासाठीही ओळखली जाते. आम्ही भविष्यातही शाळेचा लौकिक वाढवण्यासाठी सर्वतोपरी प्रयत्न करू!
अध्यक्ष, शाळा व्यवस्थापन समिती
____________________________________
