२०८ रुपयांचे अंतिम बिल खात्यावर वर्ग; मोफत घरपोच साखरेची वचनपूर्ती
रेठरे बुद्रुक : य. मो. कृष्णा सहकारी साखर कारखान्याचा बॉयलर अग्निप्रदीपन करताना चेअरमन डॉ. सुरेश भोसले व सौ. उत्तरा भोसले. बाजूस श्री. विनायक भोसले, व्हाईस चेअरमन जगदीश जगताप व संचालक मंडळ.
रेठरे बुद्रुक|कृष्णाकाठ वृत्तसेवा:
रेठरे बुद्रुक येथील य. मो. कृष्णा सहकारी साखर कारखान्याच्या सभासदांची यंदाची दिवाळीही गोड होणार आहे. कारण कृष्णा कारखान्याने गेल्या हंगामातील ऊसबिलाचा २०८ रुपयांचा अंतिम हफ्ता शेतकरी सभासदांच्या खात्यावर वर्ग केला आहे. तसेच सत्ताधारी जयवंतराव भोसले सहकार पॅनेलच्यावतीने चेअरमन डॉ. सुरेश भोसले व डॉ. अतुल भोसले यांनी निवडणुकीपूर्वी प्रत्येक सभासदास दिली जाणारी प्रतिशेअर ६० किलो मोफत साखर घरपोच देण्याचे अभिवचन दिले होते. या अभिवचनाची वचनपूर्ती करत कारखान्याने, विजयादशमीच्या शुभमुहूर्तावर घरपोच मोफत साखर मोहिमेचा प्रारंभ करण्यात आला.
विजयादशमीच्या शुभमुहूर्तावर य. मो. कृष्णा सहकारी साखर कारखान्याचा ६२ वा बॉयलर अग्निप्रदीपन सोहळा उत्साहात संपन्न झाला. चेअरमन डॉ. सुरेश भोसले व त्यांच्या सुविद्य पत्नी सौ. उत्तरा भोसले यांच्या हस्ते आणि श्री. विनायक भोसले, व्हाईस चेअरमन जगदीश जगताप यांच्यासह मान्यवर संचालकांच्या उपस्थितीत बॉयलर अग्नि प्रदीपन करण्यात आले.
याप्रसंगी बोलताना डॉ. भोसले म्हणाले, की आजचा कार्यक्रम हा प्रामुख्याने कामगारांचा आहे. कृष्णा कारखान्यातील संपूर्ण कामगार वर्ग हा कृष्णेच्या कुटुंबाचा एक महत्वाचा घटक आहे. त्यामुळे कामगारांना आम्ही कोणत्याही प्रकारची अडचण येऊ देणार नाही. कामगारांच्या पाठीशी कारखाना नेहमीच भक्कपणे उभा राहिल. सभासदांनी आम्हाला भरघोस मते देताना आमच्याबरोबरच कामगारांवरही मोठा विश्वास दाखविला आहे. त्यामुळे या विश्वासाला पात्र राहून आपण सर्वांनी एकत्रितपणे कारखान्याच्या प्रगतीसाठी प्रयत्न केले पाहिजेत.
कृष्णा कारखान्याने आपली प्रतिदिन गाळप क्षमता १२००० मेट्रीक टन करण्याचा निर्णय घेतला आहे. तसेच गेल्या हंगामातील ऊसबिलाचा २०८ रुपयांचा अंतिम हफ्ता शेतकरी सभासदांच्या खात्यावर वर्ग केला आहे. तसेच येत्या काळात तोडणी यंत्रणा अधिक सक्षम बनविण्यासाठी ऊसतोड करणाऱ्या ट्रॅक्टर्सना जीपीएस प्रणाली बसविण्यात येणार आहे. याशिवाय भविष्याचा वेध घेत, इथेनॉल उत्पादनात वाढ करण्याबरोबरच येत्या काळात सी.एन.जी. प्रकल्प उभारण्याचाही मानस आहे.
कामगार हा सभासद व संचालक मंडळातील महत्वाचा दुवा असून, कामगारांच्या सहकार्याने यंदाच्या हंगामात कृष्णा कारखाना उच्चांकी गाळप करेल, असे प्रतिपादन व्हाईस चेअरमन जगदीश जगताप यांनी केले.
कार्यकारी संचालक सूर्यकांत दळवी प्रास्तविकपर भाषणात म्हणाले, कारखान्याकडे यंदा १५००० हेक्टर ऊसाची नोंद झालेली आहे. येणारा हंगाम हा १६० दिवसांहून अधिकचा असून, कारखान्याने १३ लाख मे.टन गाळपाचे उद्दिष्ट ठेवले आहे. साखरेचा सरासरी उतारा १२.७५ टक्के राहिल याकडे प्रशासनाचा कटाक्ष असून, १५ ते १६ लाख क्विंटल साखरेचे उद्दिष्ट निश्चित केले आहे. तसेच को-जनरेशन विभागातून ६ कोटी युनिट वीजनिर्मिती, तर २ कोटी लिटरहून अधिक इथेनॉलचे उत्पादन घेण्याचा संकल्प आहे.
यावेळी संचालक लिंबाजीराव पाटील, दयानंद पाटील, जितेंद्र पाटील, धोंडिराम जाधव, गुणवंतराव पाटील, निवासराव थोरात, संजय पाटील, बाबासो शिंदे, बाजीराव निकम, संभाजीराव पाटील, सयाजी यादव, दत्तात्रय देसाई, जे. डी. मोरे, विलास भंडारे, वसंतराव शिंदे, अविनाश खरात, दीपक पाटील, कार्यकारी संचालक सूर्यकांत दळवी, पं. स. सदस्य बाळासाहेब निकम, पैलवान आनंदराव मोहिते, एम. के. कापूरकर, बहेचे माजी उपसरपंच मनोज पाटील, वैभव जाखले, बाळासाहेब पाटील, सेक्रेटरी मुकेश पवार आदींसह सर्व अधिकारी, कर्मचारी व सभासद शेतकरी उपस्थित होते.
***
